بداية الموضوع كانت وعمري ١٢ سنه كنت توي باديه أتعلم أرسم وانجذبت لرسم الملابس أول شي
بدأت أبتكر فيها وأتعلم أكثر كيف أرسمها وبعدها بكم شهر قررت إني لما أكبر بصير مصممة ازياء
كنت أرسم طول وقتي وأبتكر وكان عندي مجتمع بالإنستقرام يشوفون رسماتي ويعلقون عليها ويقترحون علي وكانوا عائلتي الصغيره
بعدها جا الوقت الي تخرجت من الثانوي وللأسف وقتها الإبتعاث على تخصص تصميم الأزياء غير متوفر
بعد كميه من البكاء والإقناع اهلي اقتنعوا اني اطلع أدرس على حسابهم
طلعت درست بماليزيا بكلية رافلز
وكانت أجمل أيام حياتي صح كلها ضغط وسهر ودموع بس كان تخصص أحلامي ومكان لقيت نفسي فيه
بعد التخرج رجعت السعوديه وجاتني جملة أهلي
" احنا ماقصرنا عليك الحين اثبتي نفسك والقي طريقك لحالك "
كان الموضوع جداً صعب وكنت صغيره مره اعتزلت العالم كله وبديت أشتغل بمحلات وتعلمت منهم اشياء كثيره ودعموني كثير
بديت بعالم العبايات لانه أكثر مجال ممكن يخلي الناس تعرفني ببداياتي وكنت أصمم الشي الي أحبه لنفسي بحكم ان عمري نفس الفئة العمريه لفئتي المستهدفة
كنت أعرض قطعي بمحل بوشية وكل ما حطيت قطعة انباعت نفس اليوم وهذا الشي الي شجعني ابدأ براندي الخاص
جمعت فلوسي وبدأت بأقل الإمكانيات من مودل من تصوير من كلشي حتى كنت أخيط أنا العبايات وتقريباً اول ٣٠ طلب طلع من عندي كان خياطتي أنا
والحمدلله يارب من بديت بسرعة انشهرت والطلبات والبركة ومحبتكم كل يوم تزيد عن اليوم الي قبله
وطبعاً عندي شغف اكبر فعالم الأزياء خلوكم حواليني ومستعدين